فی تولہ سونے کی قیمت میں ایک مرتبہ پھر بڑی کمی

 

لاہور: (ویب ڈیسک) ملک بھر کی صرافہ مارکیٹوں میں فی تولہ سونے کی قیمت ایک مرتبہ پھر دھڑام سے نیچے آ گئی۔ قدر 2800 روپے گر گئی۔

تفصیلات کے مطابق بین الاقوامی مارکیٹ میں فی اونس سونے کی قیمت میں 42 امریکی ڈالر کی بڑی کمی ریکارڈ کی گئی اور نئی قیمت 1 ہزار 685 امریکی کرنسی ہو گئی ہے۔

عالمی مارکیٹ میں قیمتیں کم ہونے کے بعد ملکی صرافہ مارکیٹوں لاہور، کراچی، اسلام آباد، پشاور، کوئٹہ، حیدر آباد، سکھر، راولپنڈی، گوجرانوالا سمیت دیگر جگہوں پر فی تولہ سونے کی قیمت میں 2800 روپے کی بڑی کمی ریکارڈ کی گئی اور نئی قیمت 1 لاکھ 2 ہزار 900 روپے ہو گئی ہے۔

فی تولہ سونے کی طرح دس گرام سونے کی قیمت میں بھی 2401 روپے کی بڑی تنزلی دیکھی گئی اور قیمت 88 ہزار 220 روپے ہو گئی ہے۔

دوسری طرف چاندی کی قیمتوں میں بھی گراوٹ دیکھی گئی، فی تولہ اور دس گرام کی قدر میں بالترتیب 40 روپے اور 34.30 روپے کی گراوٹ دیکھی گئی اور نئی قیمتیں 1320 روپے اور 1131.68 روپے ہو گئی ہے۔